Umah kayu sing suwe tau nggo pengimpen bareng. Dudu gedhong magrong-magrong, mawa saka guru gedhe neng ngarep kaya istana. Umah cekli tur asri, maneka kembang sekelilinge. Bale ngarep Amba, ana risban lan meja kayu nangka gedhe, nggo pranti jagong loroan. Sewektu-wektu rubung karo anak, angger agi padha kober.
Umah prelambang awak. Ana pandasi sing dadi dhedhasare urip. Sakane kudu kuwat kanggo nyangga butuh penguripan. Ana payon sing nggo ngayomi seisine umah. Pager kanggo nutupi ala-becike umah-umah. Ana jendhela kanggo ndeleng kahanan neng njaba.
Gegaraning wong akrami
Dudu bandha dudu rupa
Amung ati pawitané
Luput pisan kena pisan
Lamun gampang luwih gampang
Lamun angèl, angèl kalangkung
Tan kena tinumbas arta
Kidung Asmaradana, kecrita pawitane wong bebojoan kue dudu merga dunya-brana lan dudu rupa. Pawitane mung ati. Angger wis salah, sebanjure bakal salah. Diarani gampang ya jane gampang. Ning Nek ketemu angel ya bangeting angel. Ora teyeng ketuku mawa duit.
Langka wong sing kepengin pugag-pegat bebojoan. Ning angger kue kudu dilakoni, menungsa titahe ikhtiar. Wis ngupa-daya, wis ndonga becik. Dene jodho, rejeki, Pati kuwe hak preogratife Gusti Allah. Katone ayem-tentrem jebul akeh ruwet-rentenge. Katon gubes paribasan unggal dina, ning jebul bareng jejodhoan ngasi tumekane Pati.
Umah kayu mawa payon seng, uga prelambang. Lemahe tetep neng ngisor. Pager lan pengadeg sekang kayu dudu tembok bata sing sekang lemah. Lemah, bumi tetep neng ngisor kejaba mengko wis neng kuburan. Kiwe, tengen, ngisor, lan ndhuwur kabeh lemah.
Akrami, jejodhoan, antarane menungsa karo menungsa, lan menungsa kelawan bumine. Kabeh kudu selaras, merga angger ora selaras bakal gonjang-ganjing. Geger-genjik selawase Urip.
Mula ana etung becik, sing jane Dudu bab tahyul. Kaki-nini gemiyen tlesih angger kon ngetung dina becik. Kapan lahire, sepite, nikahe, gawe umah, tuku samubarang, tetanduran, tor-toran, lan liya-liyane. Kabeh nganggo pranata mangsa. Merga ana mangsa sing selaras antara menungsa karo bumine.
Siki wis padha ora kanti. Asal bres kapan karepe. Mula angger ana sing ora pas hasile, gari ditiliki etung dinane. Dununge candra sengkala sing marakna ana dina becik lan dina kapesan. Sing kuwe nggawa watek-wancine si jabang bayi.
Inyong cokan ngiri weruh Rama-Biyung. Lara-lapa dilakoni bareng. Nggedhekna bocah sing pitu cacahe. Cinontohan watek semadya lan nrima ing pandum.
Rangga Sujali
Editor tamu indiebanyumas.com
